“Boxtrolls” və “ParaNorman” kimi animasiya filmlərinin prodüseri olmuş Travis Knight bu dəfə rejissor kimi qarşımızdadır. Onun rejissor kimi ilk işi olan “Kubo and the two strings” isə xeyli uğurlu oldu və ilin ən yaxşı filmləri sırasına daxil edilir. Film artıq Qızıl Qlobusa namizəd olub və “Oskar”, “Bafta” və böyük ehtimalla başqa bir neçə nüfuzlu mükafatlara da ən azı namizəd göstəriləcək.

Kubonun atası samuraydır və Ay Döyüşçüsü tərəfindən öldürülmüşdür. Ay Döyüşçüsü Kubonun doğma babasıdır və öz nəvəsinin sağ gözünü ondan almışdır. Uzun müddət anası ilə bir qayada gizlənən Kubo hər gün öz oriqamiləriylə kənd sakinlərinə maraqlı hekayələr danışır.O,bir gün meşədə yubanır və bədxah ruhlar onun yerini öyrənir. Anasından ayrılaraq atasının döyüş zirehini axtarmağa çıxan Kubo yolda meymun və böcəklə tanış olur. Babası isə hələ də onun izini buraxmayıb və təhlükə çox uzaqda deyil…